मौसम पूर्वानुमानको सूचनालाई पालना गर्न प्रधानमन्त्री ओलीको आग्रह

प्रधानमन्त्री केपी शर्मा ओलीले मौसम पूर्वानुमानको सूचनालाई पालना गर्न र आवश्यक सतर्कता अपनाउन आग्रह गर्नुभएको छ । आज बिहान सामाजिक सञ्जाल फेसबुकमार्फत् उहाँले मौसम विज्ञान विभागले देशका विभिन्न ठाउँमा ठूलो पानी पर्न सक्ने पूर्वानुमान गरेअनुसार चनाखो रहन र सावधानी अपनाउन अनुरोध गर्नुभएको हो ।

यो बेला हुन सक्ने मनसुनजन्य विपद् र यसबाट जोगिन अत्यावश्यकबाहेक लामो यात्रा नगर्न र सुरक्षित ठाउँमा बस्न उहाँको आग्रह छ । साथै प्रधानमन्त्री ओलीले सुरक्षाकर्मीलाई आवश्यक सुरक्षाको लागि तयारी अवस्थामा रहन पनि निर्देशन दिनुभएको छ ।

आज र भोलि देशका विभिन्न ठाउँमा ठूलो पानी पर्न सक्ने मौसमविद्ले बताएका छन् । विशेषगरी कोशी, बागमती र गण्डकी प्रदेशलगायत देशका पहाडी भागमा ठूलो वर्षाको सम्भावना छ ।