सम्झना मृत्यु प्रकरणमा ससुरा पनि प*क्रा*उ

बेलडाडी, कञ्चनपुर -

प्रहरीले कञ्चनपुरको बेलडाँडीकी सम्झना भट्टका ससुरालाई पनि पक्राउ गरेको छ । आइतबार बेलडाँडी गाउँपालिका–२ सिहपाल टोलकी १८ वर्षीया सम्झना भट्ट झुण्डिएको अवस्थामा मृत फेला परेको घटनामा अनुसन्धानका लागि उनका ससुरा हरिदत्त भट्टलाई पनि पक्राउ गरिएको कञ्चनपुर प्रहरीले जनाएको छ ।

उक्त प्रकरणमा सोमबार सम्झनाका २४ वर्षीय श्रीमान पवन भट्टलाई पक्राउ गरिएको थियो । कञ्चनपुरका प्रहरी नायब उपरीक्षक (डीएसपी) सागर बोहराका अनुसार सम्झना आफ्नै सुत्ने कोठामा झुन्डिएको अवस्थामा फेला परेकी थिइन् । डीएसपी बोहराले भने, ‘माइती पक्षले घरेलु हिंसा गर्ने, दाइजोको निहुँमा यातना दिने र मानसिक तनाव दिने गरेको आरोप लगाएका छन् ।’ माइती पक्षकै जाहेरीको आधारमा प्रहरीले पवन भट्ट र हरिदत्तलाई पक्राउ गरेको प्रहरीको भनाई छ ।

दुबै जनालाई अदालतबाट म्याद थप गरी हिरासतमा राखेर अनुसन्धान प्रक्रिया अगाडि बढाइएको डीएसपी बोहराले बताए । सम्झना र पवनले करिब छ महिनाअघि मात्रै प्रेम विवाह गरेका थिए । प्रहरीका अनुसार विवाहपछि उनीहरुको सम्बन्ध बिग्रेको थियो । सम्झना झुण्डिएको अवस्थामा मृत फेला पर्नु एक दिनअघि मात्रै शनिबार उनीहरूबीच विवाद हुँदा बेलडाँडी प्रहरी चौकीमा पुगेका थिए र त्यस दिन प्रहरीले दुवैलाई सम्झाई–बुझाई घर पठाएको डीएसपी बोहराले बताए । पीडितका माइती पक्षले दिएको जाहेरीमा दाइजोको विषय पनि उल्लेख गरिएको छ ।