युद्धकाे पहिलाे महिनामै विपिनकाे हत्या भएकाे इजरायली सेनाकाे दाबी

हमासले फिर्ता गरेको ४ जना बन्धकको शवमध्ये एक नेपाली विद्यार्थी विपिन जोशीको रहेको इजरायली सेनाले पुष्टि गरेको छ ।

हमासले गएराति इजरायललाई ४ जनाको शव हस्तान्तरण गरेको थियो । इजरायली सेनाले फरेन्सिक परीक्षणबाट शवको पहिचान पुष्टि गरेको बताएको इजरायली सञ्चारमाध्यम द जेरुसेलम पोस्टले जनाएको छ ।

यसैबीच इजरायली सेनाले युद्धको पहिलो महिनामै गाजामा कैद गरिएको अवस्थामा हमासले विपिन जोशीको हत्या गरेको दाबी गरेको छ ।

सन् २०२३ को अक्टुबर ७ तारिखमा हमासले इजरायलयमा गरेको अप्रत्याशित आक्रमणपछि जोशीसहित २ सय ५१ जना अपहरणमा परेका थिए । इजरायलमा भएको आक्रमणमा १० जना नेपालीसहित १ हजार २ सय जनाको ज्यान गएको थियो ।

विपिनसहित ज्यान गुमाउने १० जना सबै नेपाली सुदूरपश्चिम विश्वविद्यालयको कृषि विज्ञान सङ्कायमा अध्ययनका क्रममा 'लर्न एन्ड अर्न' कार्यक्रम अन्तर्गत इजरायल पुगेका विद्यार्थी थिए ।