बेलडाँडीमा राष्ट्रिय स्वतन्त्र पार्टीमा प्रवेश गर्नेको लर्को

निरु चाैधरी / बेलडाडी, कञ्चनपुर —

कञ्चनपुर क्षेत्र नं. १ अन्तर्गत बेलडाँडी गाउँपालिकामा राष्ट्रिय स्वतन्त्र पार्टी (रास्वपा)मा प्रवेश गर्नेको लर्को देखिएको छ। शुक्रबार आयोजित एक विशेष कार्यक्रममा बेलडाँडीका विभिन्न समुदायका नागरिकहरूले एकै साथ पार्टीमा प्रवेश गर्दै रास्वपाको नीति र नेतृत्वप्रति विश्वास व्यक्त गरेका छन्।

कार्यक्रममा पूर्व क्षेत्रपाल हिरा सिह राना, भलमन्सा श्रीराम राना, युवा व्यवसायी भोजराम राना, फकिरा राना, उदय सिह ओड लगायत १ सय २ जना नागरिकले औपचारिक रूपमा पार्टी प्रवेश गरेका हुन्। 

उनीहरूलाई रास्वपाका केन्द्रीय प्रचार–प्रसार विभागका सदस्य जनक सिंह धामीले ब्याच र प्रतीक चिन्ह लगाई स्वागत गर्दै सदस्यता ग्रहण गराएका थिए।

कार्यक्रममा पालिका सभापति तेज सिंह धामी, महाधिवेशन प्रतिनिधि नन्दबीर बुढा, जिल्ला सदस्य कमला दमाई, संगठन विभाग प्रमुख पदम बहादुर पाण्डेय लगायतका नेताहरूको विशेष उपस्थिति रहेको थियो। 

नेता धामीले नवप्रवेशी सदस्यहरूलाई स्वागत गर्दै भने, “रास्वपा कुनै व्यक्तिको होइन, सोच र प्रणाली सुधारको आन्दोलन हो। पुरानो शैलीको राजनीति अब जनताले अस्वीकार गरिसकेका छन्। देशलाई पारदर्शी, जवाफदेही र सेवामुखी नेतृत्व चाहिएको छ, र यही दिशा रास्वपाले देखाएको छ।”

राना परिवारका सदस्यहरू अगुवाइमा भएको सामूहिक प्रवेशले स्थानीयस्तरमा ठूलो उत्साह देखिएको थियो। 

पूर्व क्षेत्रपाल हिरा सिह रानाले भने, “हामीले पुराना दलहरूमा धेरै समय विश्वास गर्यौं, तर जनताको आवाज बेवास्ता हुँदै गयो। अब नयाँ पुस्तासँग मिलेर सुधारको बाटो रोज्ने निर्णय गरेका छौं।” 

त्यस्तै, समाजसेवी श्रीराम रानाले रास्वपाको नीति र पारदर्शिताले आफूहरूलाई आकर्षित गरेको बताउँदै भने, “अब बेलडाडीमा विकास, सुशासन र जवाफदेहिताको अभ्यास यहीँबाट सुरु हुनेछ।”

 युवा व्यवसायी भोजराम रानाले भने, “हामी परिवर्तनका दर्शक होइन, सहभागी बन्न आएका हौं। रास्वपा नयाँ पुस्ताको आशा बनेको छ।”

पालिकाका सभापति तेज सिंह धामीले बेलडाँडीमा रास्वपाको प्रभाव तीव्र गतिमा बढ्दै गएको बताउँदै भने, “हामी वडावडामा संगठन विस्तार गर्दै स्थानीय तहमा सेवा, जवाफदेहिता र जनउत्तरदायित्वको संस्कृति स्थापना गर्नेछौं।” उनले नजिकिँदै गरेको स्थानीय तहको निर्वाचनमा बेलडाँडीले ऐतिहासिक योगदान दिने विश्वास व्यक्त गरे।

रास्वपाका केन्द्रीय सदस्य जनक सिंह धामीले कार्यक्रमकै क्रममा आगामी दिनमा ‘जनतासँग संवाद कार्यक्रम’, ‘युवा सहभागिता अभियान’ र ‘सफा शासन’ अभिमुख जनचेतनामूलक गतिविधि सञ्चालन गरिने घोषणा गरे। 

उनले थपे, “हाम्रो उद्देश्य सत्ता होइन, प्रणाली सुधार हो। नागरिकको कर तिरेर चल्ने राज्यले नागरिकप्रति जवाफदेही हुनैपर्छ, यही सोचका साथ हामी अघि बढेका छौं।”

कञ्चनपुरमा पछिल्ला वर्षहरूमा रास्वपाप्रतिको आकर्षण तीव्र गतिमा बढ्दै गएको छ। 

पुराना दलप्रति असन्तुष्ट जनमतले वैकल्पिक राजनीतिप्रति भरोसा देखाउन थालेका छन्। 

बेलडाँडीमा भएको १ सय २ जना नागरिकको सामूहिक प्रवेश केवल सदस्यता विस्तार होइन, सोच र संस्कृतिको रूपान्तरण हो। 

राना परिवारसहितको यो सामूहिक कदमले कञ्चनपुरको दक्षिणी क्षेत्रलाई नयाँ राजनीतिका केन्द्रका रूपमा स्थापित गर्ने संकेत दिएको छ।

स्वच्छ राजनीति, इमानदार नेतृत्व र जनमुखी दृष्टिकोणका साथ रास्वपाको यो यात्रा अब सुदूरपश्चिमका गाउँ–गाउँमा फैलिँदै जाने विश्वास समेत धामीले गरेका छन् ।