बेलाैरी : दाेस्राे रामलीला मञ्चन कार्यक्रम भव्यताका साथ सम्पन्न

शीतल भट्ट / बेलौरी, कञ्चनपुर —

बेलौरी नगरपालिकाको सांस्कृतिक पहिचान बन्दै आएको रामलीला मञ्चनको दोस्रो संस्करण यस वर्ष पनि भव्य रूपमा सम्पन्न भएको छ। 

बेलौरी सांस्कृतिक तथा रामलीला समितिको आयोजनामा कार्तिक १५ गतेदेखि सुरु भएको १२ दिने धार्मिक–सांस्कृतिक नाट्य महोत्सव बुधबार साँझ “जय श्रीराम” का नाराबीच सम्पन्न गरिएको हो।

निरन्तर १२ दिनसम्म बेलौरी बजार क्षेत्र भक्तिभाव, उत्साह र सांस्कृतिक रौनकले भरिएको देखिन्थ्यो। हरेक साँझ हजारौं हजार श्रद्धालु भक्तजनहरूको उपस्थितिमा भगवान् राम, सीता, लक्ष्मण, भरत, हनुमान लगायतका पात्रहरूद्वारा रामायणका प्रसङ्गहरू जीवन्त रूपमा प्रस्तुत गरिएका थिए।

समापन समारोहमा उपस्थित बेलौरी नगर उपप्रमुख जोगराम चौधरीले रामलीलाले धार्मिक शिक्षासँगै समाजमा नैतिकता, सत्य, संयम र सदाचारको सन्देश फैलाएको बताए। उनले भने — “रामलीला केवल नाटक होइन, हाम्रो धर्म, संस्कार र सह–अस्तित्वको प्रतीक हो। यसले समुदायबीच एकता र आपसी सद्भाव बलियो बनाएको छ।”

उनले नगरपालिकाको तर्फबाट आगामी वर्षको रामलीला मञ्चनलाई अझ व्यवस्थित र व्यापक बनाउन निरन्तर सहयोग गर्ने प्रतिबद्धता समेत व्यक्त गरे।

त्यसैगरी समाजसेवी बलदेव सिंह बुडालले रामलीलालाई धार्मिक परम्पराको जगेर्ना र नयाँ पुस्तामा सांस्कृतिक चेतना जगाउने सशक्त माध्यमका रूपमा व्याख्या गरेका छन् ।

उनका अनुसार, “रामलीला हाम्रो आस्था र संस्कृति जोगाउने अभियान हो, जसले युवामा नैतिकता र जिम्मेवारीको भावना समेत जगाउँछ।”

रामका पात्र एवम् निर्देशक डा. भूपेन्द्र सिंह विष्टले कलाकारहरूको अथक परिश्रम, अनुशासन र श्रद्धाले नै यस वर्षको मञ्चनलाई ऐतिहासिक बनाएको बताए।

उनले भने — “यो केवल अभिनय होइन, आत्मसमर्पणको साधना हो। प्रत्येक पात्रले आफ्नो भूमिकामा रामभक्तिको आत्मा भरेर मञ्चलाई जीवन्त बनाएका थिए।”

रामलीला कथाका व्याख्यानकर्ता एवम् रावणका पात्र प्रेमसिंह बोहराले भगवान् रामको जीवन मानव सभ्यताका लागि सर्वोच्च आदर्श भएको उल्लेख गर्दै भने — “रामायण केवल कथा होइन, जीवनको दिशा हो। सत्य, कर्तव्य र धर्ममा अडिग रहनु नै रामको मूल शिक्षाको सार हो।”

कार्यक्रममा स्थानीय भक्तजन, समाजसेवी, धार्मिक अगुवा तथा सर्वसाधारणहरूको उल्लेखनीय उपस्थिति रहेको थियो। रामलीला मञ्चन अवधिभर बेलौरी बजार “जय श्रीराम” का जयघोषले गुन्जायमान रह्यो।

रामलीला समितिका अध्यक्ष दिनेश कुँवरले कार्यक्रमको भव्य सफलताका लागि सम्पूर्ण सहयोगी, दातृ, कलाकार र भक्तजनप्रति आभार व्यक्त गर्दै भने — “यो केवल सांस्कृतिक कार्यक्रम होइन, हाम्रो आस्था र एकताको पुनर्जागरण पनि हो। सहयोगी सबैलाई पुनः धन्यवादका साथै आगामी तेस्रो संस्करणलाई अझ भव्य र व्यवस्थित बनाउने विश्वास समेत व्यक्त गर्दछु।”

समापनमा उत्कृष्ट अभिनय, सृजनात्मक प्रस्तुति र सांस्कृतिक योगदानका लागि कलाकार, दानदाताहरूलाई सम्मानपत्र प्रदान गरिएको छ। 

अन्तिम दिन प्रस्तुत गरिएको ‘रामराज्य अभिषेक’ को प्रसङ्गले दर्शकहरूलाई भावविभोर बनाउँदै कार्यक्रमको रंगीन समापन गरिएको थियो।