वात्सल्यकाे लगातार चौंथो जित, एक्सिस विद्या आश्रम २९ रनले पराजित

चन्द्रिका चाैधरी/ बेलाैरी, कञ्चनपुर  —

ड्रिमर्स कप २०८२ अण्डर–६ कक्षाको क्रिकेट प्रतियोगितामा वात्सल्य विद्या निकेतनका साना खेलाडीहरूले शुक्रबार धनगढीमा सम्पन्न लिग खेलमा एक्सिस विद्या आश्रमलाई २९ रनको फराकिलो अन्तरले पराजित गर्दै लगातार चौथो जित हासिल गरेका छन्।

१० ओभरको खेलमा पहिले ब्याटिङ गरेको वात्सल्यले आक्रमक खेल प्रदर्शन गर्दै प्रतिस्पर्धी टोलीका लागि ८३ रनको लक्ष्य तोकेको थियो।

उक्त लक्ष्य पछ्याउन मैदान उत्रिएको एक्सिस विद्या आश्रम निर्धारित ओभरमा आवश्यक रन बनाउन नसकेपछि खेल २९ रनले हारमा सीमित रह्यो।

वात्सल्यका खेलाडीहरूले प्रभावशाली खेल प्रस्तुत गरेका थिए। महेश बिष्टले ४ चौकासहित २८ रन बनाउँदै बलिङमा १ ओभरमा २ रन मात्र दिएर २ विकेट झारे। प्रविन धामीले १८ रन जोड्दा टोलीको सुरुवात मजबुत भयो, यद्यपि उनी रन–आउट भए।

निर्मल केसीले १ ओभरमा २ विकेट लिए भने एन्स रानाले २ ओभरमा २ विकेट झारे। भिएब रानाले २ ओभरमा ६ रन मात्र दिएर १ विकेट लिएका थिए र अन्तिममा नटआउट ५ रन जोड्दै टोलीलाई सुरक्षित स्थिति दिलाए। अरुन कुशले दुई उत्कृष्ट क्याच समात्दै प्रभावशाली फिल्डिङ गरेका थिए ।

वात्सल्य विद्या निकेतनका प्रिन्सिपल लक्ष्मण दियालले भने, “हाम्रा साना खेलाडीहरूले अनुशासन, लगनशीलता र टीमवर्कको उत्कृष्ट उदाहरण प्रस्तुत गर्दै विद्यालयको गौरव बढाएका छन्। यस्तो प्रतियोगिताले बालबालिकामा आत्मविश्वास र खेलप्रतिको प्रेम समेत जगाउँछ।”

प्रतियोगिता आयोजना गर्ने ड्रिमर्स समूहलाई बालस्तरमै क्रिकेट प्रतिभा विकास गर्ने र खेलप्रति उत्साह जगाउने योगदानको लागि वात्सल्य पक्षले विशेष धन्यवाद दिएको छ।

वात्सल्यको लिग चरणको अन्तिम खेल कार्तिक २९ गते, शनिबार बिहान १० बजे चैतन्य पाठशालासँग तय भएको जनाइएको छ। लगातार उत्कृष्ट प्रदर्शन गर्दै आएका वात्सल्यका साना क्रिकेटरहरूको आगामी खेलमा पनि सफलता सुनिश्चित हुने अपेक्षा गरिएको छ।