बेलाैरी : कोभिड–१९ बचत रकमबाट तीन स्वास्थ्य संस्थालाई शव चिस्यान मेसिन हस्तान्तरण

शीतल भट्ट / बेलाैरी, कञ्चनपुर —

कोभिड–१९ महामारीमा बेलौरीका युवाहरूले सञ्चालन गरेको ‘मानव बचाउ अभियान’बाट सञ्चित रकमले तीन स्वास्थ्य संस्थालाई नि:शुल्क शव चिस्यान मेसिन हस्तान्तरण गरिएको छ।

अभियानका संयोजक एवम् सिद्धबाबा एकेडेमी बेलाैरीका प्रिन्सिपल खड्क शाहको संयोजनमा बुधबार बेलौरी नगरपालिका–अन्तर्गत रहेका श्रीपुर प्राथमिक स्वास्थ्य केन्द्र, लक्ष्मीपुर स्वास्थ्य चौकी र रामपुर स्वास्थ्य चौकीलाई एक–एक थान शव चिस्यान मेसिन हस्तान्तरण गरिएको हाे।

स्थानीय स्वास्थ्य संस्थामा यस्ता उपकरण अभावका कारण मृतकको व्यवस्थापनमा पटक–पटक समस्या देखिँदै आएको अवस्थामा प्राप्त मेसिनले सेवामा सहजता ल्याउने अपेक्षा गरिएको छ। सामग्री हस्तान्तरण कार्यक्रमका क्रममा स्थानीय, स्वास्थ्यकर्मी तथा समाजसेवीहरूको उत्साहपूर्ण सहभागीता रहेको थियो।

वरिष्ठ समाजसेवी उद्योगी एवम् इन्जिनियर दिपेन्द्र विष्टले कोभिड महामारीका समय संकलित रकमको विवरण सार्वजनिक गर्दै बचनदान सहित कूल २५ लाख १३ हजार ३५ रुपैयाँ ७० पैसा संकलन भएको जनाएका छन्।

उनका अनुसार त्यसमध्ये १२ लाख १० हजार ७ सय ७० रुपैयाँ तत्कालीन आवश्यक सामग्री—जस्तै मास्क, पिपिई, सेनिटाइजर, औषधि तथा राहत वितरण—मा खर्च भएको थियो।

बाँकी बचत रकम ७ लाख ७० हजार ३ सय ४८ रुपैयाँबाट अहिले तीनवटा शव चिस्यान मेसिन खरिद गरी सम्बन्धित स्वास्थ्य संस्थामा हस्तान्तरण गरिएको उनले बताए।

विष्टका अनुसार नागरिकबाट प्राप्त सहयोगलाई दीर्घकालीन र उद्देश्यपूर्ण कार्यमा परिणत गर्न पाउनु स्वयं अभियानमा संलग्न सबैका लागि गर्वको विषय बनेको छ।

यस अभियानलाई सफल रूपले सञ्चालन गर्न समाजसेवी मेवाराम चौधरी, लक्ष्मण दियाल, महेशराज जोशी, रविन्द्र श्रेष्ठ, ज्ञानेन्द्र जोशी लगायतका स्थानीय युवाहरूले महत्वपूर्ण भूमिका निर्वाह गरेका थिए।

उनीहरूको समन्वय, सहयोग र निरन्तर सक्रियताले महामारीकै दिनदेखि अहिलेका यस्ता कार्यक्रम सम्मलाई निरन्तरता दिँदै आएको बताइएको छ।

समाजसेवी मेवाराम चौधरीले महामारीमा युवाहरूले देखाएको नेतृत्व, समर्पण र साहसलाई ‘उदाहरणीय’ भन्दै, अहिले प्राप्त भएको उपकरणले स्थानीय स्वास्थ्य संस्थाको क्षमतामा अभूतपूर्व सुधार ल्याउने प्रतिक्रिया जनाएका छन्।

उनका अनुसार समुदायका लागि गरिएको काम समुदायमै फर्केर आउने हो भन्ने कुरालाई यस कार्यक्रमले प्रमाणित गरेको छ।

त्यस्तै समाजसेवी लक्ष्मण दियालले शव चिस्यान मेसिनजस्तो उपकरणले स्वास्थ्य संस्थामा विश्वसनीयता, सम्मानजनक व्यवस्थापन र सेवा प्रवाहमा निकै सहयोग पुग्ने टिप्पणी गर्दै, बेलौरीका युवाहरूले महामारीका कठिन दिनमा जन्माएको सहकार्यको भावना अझै जीवित रहेको बताए।

कोभिड–१९ महामारीका दिनमा बेलौरी क्षेत्र पनि अन्य क्षेत्रझैँ संक्रमण, त्रास र अभावको चपेटामा परिरहेको थियो। अस्पताल तथा स्वास्थ्य चौकी उपकरण अभाव, स्रोत अभाव र जनशक्ति अभावको चुनौतीसँग जुधिरहेका बेला युवाहरूको नेतृत्वमा सञ्चालन भएको ‘मानव बचाउ अभियान’ले तत्कालीन आवश्यकताहरू पूरा गर्दै समुदायमा ठूलो राहत प्रदान गरेको थियो।

त्यही अभियानमार्फत सङ्कलित स्रोत अहिले स्थायी स्वास्थ्य पूर्वाधार निर्माणमा प्रयोग हुनुले महामारीले छाडेर गएको मानवीय सम्बन्ध, सहकार्य र सामुदायिक उत्तरदायित्व अझ सुदृढ भएको देखिन्छ।

स्वास्थ्य संस्थामा उपलब्ध गराइएका मेसिनहरूले भविष्यमा उत्पन्न हुन सक्ने स्वास्थ्य आपतकालीन अवस्थाहरूमा मृतक व्यवस्थापनलाई सम्मानजनक र सुरक्षित बनाउने अपेक्षा गरिएको छ।

बेलौरी नगरपालिकाले पनि समुदायबाट प्राप्त यस्ता योगदानले स्थानीय स्वास्थ्य प्रणालीलाई बलियो बनाउन महत्वपूर्ण भूमिका खेल्ने विश्वास व्यक्त गरेको छ।

समग्रमा, महामारीका कठिन दिनमा युवाहरूले सुरु गरेको अभियानले आज बेलौरीको स्वास्थ्य सुरक्षा र सेवाको स्थायित्वमा ठोस योगदान गरेको स्थानीयकाे बुझाइ छ।

समुदायको विश्वास, सहकार्य र सद्भावबाट संकलित रकम दिगो उपयोगमा परिणत भएको यसकार्यलाई स्थानीयले ‘संकटले सिकाएको ऐक्यबद्धताको उदाहरण’का रूपमा समेत लिएका छन्।