आउँदाे चुनावका लागि १ सय ६८ वटा मतदानस्थल थप

निर्वाचन आयोगले आउँदो फागुन २१ गतेका लागि तोकेको प्रतिनिधिसभा चुनावका लागि १ सय ६८ वटा मतदानस्थल थप गरेको छ । आयोगको आज बसेको बैठकले १ सय ६८ वटा मतदानस्थल थप गर्ने निर्णय गरेको प्रवक्ता तथा सहसचिव नारायणप्रसाद भट्टराईले जानकारी दिनुभयो ।

यस्तै आयोगले मतदातालाई अपायक परेका, जीर्ण रहेका वा प्रयोगमा नरहेका ९३ वटा मतदानस्थल खारेज गरेको छ । यसबाट साविकमा कायम १० हजार ८९२ मा ७५ वटा मतदानस्थल थपिएर अब देशभर १० हजार ९६७ मतदानस्थल कायम भएको भट्टराईले बताउनुभयो ।

यस्तै आयोगले फागुन २१ गते हुने प्रतिनिधिसभा चुनावमा मौज्दातमा रहेको मतपेटिका पनि प्रयोग गर्ने भएको छ । आयोगले अघिल्लो पटकको चुनावमा खरिद गरेर मौज्दात रहेका ९० हजार मतपेटिका प्रयोग गर्ने र नपुग हुने ४५ हजार मतपेटिका खरिद गर्ने निर्णय गरेको छ ।

त्यस्तै आयाेगले मतपत्र छपाइका लागि अघिल्लो पटक खरिद गरेर मौज्दात रहेको कागज पनि प्रयोग गर्ने भएको छ । आयोगलाई मतपत्र छपाइका लागि ३ सय मेट्रिक टन कागज आवश्यक हुन्छ तर आयोगसँग ५ सय ६६ मेट्रिक टन कागज मौज्दात छ ।