कञ्चनपुरमा मतदाता दर्तामा युवाको उत्साह

कञ्चनपुर -

आगामी फागुन २१ गते हुने प्रतिनिधि सभा निर्वाचनका लागि कञ्चनपुरमा जारी मतदाता नामावली दर्ता तथा अद्यावधिक अभियानमा युवाको उल्लेख्य सहभागिता देखिएको छ।

जिल्ला निर्वाचन कार्यालयका अनुसार असोज १० देखि कात्तिक २० गतेसम्म जम्मा १ हजार ७६५ जनाले नयाँ नाम दर्ता गराएका छन्, जसमा करिब ७० प्रतिशत युवा मतदाता रहेका छन्।

कार्यालयका सूचना अधिकारी भानबहादुर महराले कात्तिकको पहिलो सातापछि दर्ता प्रक्रियामा तीव्रता आएको बताए। “दसैँ, तिहार र छठका कारण सुरुमा काम ढिलो भयो, अहिले दैनिक ८० देखि १२० जना नयाँ मतदाता दर्ता गराइरहेका छन्,” उनले भने।

हालै सरकारले ल्याएको अध्यादेशअनुसार ‘जेनजी पुस्ता’ का युवा मतदाताले पनि आगामी निर्वाचनमा मतदान गर्न पाउने व्यवस्था भएपछि युवाको उत्साह बढेको हो।

निर्वाचन आयोगले यसपटक नागरिकलाई जुनसुकै जिल्लाको निर्वाचन कार्यालयमा गएर नाम दर्ता वा अद्यावधिक गर्न सक्ने व्यवस्था गरेको छ। कञ्चनपुरबाट अन्य जिल्लाका १०३ जनाले पनि नाम दर्ता गराएको कार्यालयले जनाएको छ।

मतदाता नामावली दर्ता तथा अद्यावधिक प्रक्रिया कात्तिक ३० गतेसम्म जारी रहनेछ।