सुदूरपश्चिम विश्वविद्यालयको डरलाग्दो बेरुजु, भ्रष्टाचार की कागजात मिलेन ?

कञ्चनपुर -

सुुदूरपश्चिम विश्वविद्यालयको १७ करोड, १६ लाख बढी बजेट बेरुजु देखिएको छ । गत आर्थिक  वर्ष ०८०÷०८१ मा सुप विश्वविद्यालयको १७ करोड, १६  लाख, २१ हजार रकम बेरुजु देखिएको हो । 

केही समय अघि महालेखाले राष्ट्रपतिलाई बुझाएको प्रतिवेदन अनुरुप कञ्चनपुर भीमदत्त नगरपालिका महेन्द्रनगरमा  केन्द्रीय  कार्यालय रहेको सुप विश्वविद्यालयले  एक आर्थिक वर्षमा ठूलो रकम बेरुजु देखिएको छ । 

महालेखाको प्रतिवेदन अनुसार ५७ लाख, ५६ हजार रुपैया अशुल्नु पर्ने र १४ करोड, ६८ लाख, ३७ हजार नियमित बेरुजु देखिएको छ । सुप विश्वविद्यालयले विभिन्न योजनाको भुक्तानी कागजात बिनै पनि  गरेकोे देखिएको महालेखाको प्रतिवेदनले जनाएको छ ।

विश्वविद्यालयले २ करोड, ४७ लाख, ८४ हजार रुपैया बिना कागज भुक्तानी गरिएको र  ७ लाख, ८३ हजार रुपैया बराबर पेश्की समेत  लगिएको पाईन्छ । यसरी शिक्षा जस्तो क्षेत्रमा ठूलो रकम बेरुजु देखिएपछि विश्वविद्यालयको क्षमता र सुशासन, आर्थिक पारदर्शीतामा  प्रश्न उब्जाएको छ । सुदूरपश्चिम विश्वविद्यालय स्रोतले प्राविधिक त्रृटी, कुनै योजनाकोे कागजात हराएको हुनसक्ने, अनि कुनै कर्मचारी, प्राध्यापकले रकम  लिएर  काम नगरेको हुनसक्ने हुँदा बेरुजु रकम बढेको, तिर्नुपर्नेदेखि बिना कागजातको समस्या आएको जनाएका छन् ।

विश्वविद्यालयको बेरुजु बढ्दै गएपछि कतै नीतिगत भ्रष्टाचार त छैन कि भनेर विद्यार्थी, अभिभावकले चिन्ता व्यक्त गरेका छन् ।