भारतले प्रायोजक विना नै एशिया कप खेल्न सक्ने

गएको महिना ‘ड्रिम–एलेभन’ ले भारतीय क्रिकेट नियन्त्रण बोर्ड (बीसीसीआई) सँगको सम्झौता समाप्त गरेपछि भारतले आउँदो एशिया कप प्रमुख प्रायोजक विना नै खेल्ने सम्भावना छ ।

‘ड्रिम–एलेभन’ सम्झौताबाट बाहिरिएपछि बीसीसीआईले हिजो सेप्टेम्बर २ देखि नयाँ प्रायोजक खोज्न थालेको छ । कुनै पनि इच्छुक कम्पनीले ‘एक्सप्रेसन अफ इन्ट्रेस्ट’ अर्थात् आशयपत्र किन्नका लागि अन्तिम मिति आउँदो सेप्टेम्बर १२ तोकिएको छ । इच्छुक कम्पनीहरूले बोलपत्र बुझाउने अन्तिम मिति सेप्टेम्बर १६ हो ।

एशिया कप यही सेप्टेम्बर ९ देखि २८ सम्म संयुक्त अरब इमिरेट्स (यूएई) मा आयोजना हुँदैछ । भारत सरकारले अनलाइन गेमिङको प्रवर्द्धन र नियमन विधेयक २०२५ पारित भएसँगै ‘ड्रिम–एलेभन’ र बीसीसीआईबीचको प्रायोजन सम्झौता रद्द भएको हो ।

आठ वटा टोली सहभागी प्रतियोगिताको समूह ‘ए’ मा भारत, पाकिस्तान, ओमान र यूएई छन् । यस्तै समूह ‘बी’ मा अफगानिस्तान, बङ्गलादेश, श्रीलङ्का र हङकङ छन् ।