बेलौरीमा दाेस्राे संस्करणकाे रामलीला प्रारम्भ, नगर प्रमुख चौधरीद्वारा उद्घाटन

शीतल भट्ट / बेलौरी, कञ्चनपुर —

धार्मिक श्रद्धा, सांस्कृतिक गौरव र सामुदायिक एकताको प्रतीकका रूपमा शनिबारदेखि कञ्चनपुरको बेलौरीमा दोस्रो संस्करणको रामलीला मञ्चन सुरु भएको छ ।

बेलौरी सांस्कृतिक तथा रामलीला समितिको आयोजनामा सुरु भएको यस वर्षको रामलीला कार्यक्रम कार्तिक १५ गतेदेखि २५ गतेसम्म सञ्चालन हुने छ ।

मर्यादापुरुषोत्तम भगवान् श्री रामको जीवनशैली प्रस्तुत गर्दै सांस्कृतिक गौरवको उत्सव उद्घाटन समारोहमा बेलौरी नगरप्रमुख पोतीलाल चौधरीले दीप प्रज्वलन गरी रामलीलाको शुभारम्भ गरेका छन् ।

प्रमुख अतिथिका रूपमा बोल्दै उनले भने, “रामलीला केवल धार्मिक कथा मात्र होइन, यो जीवनकाे आदर्श, धर्म र सत्यको सन्देश पनि हो । यस्ता सांस्कृतिक कार्यक्रमले समाजमा नैतिकता, सदाचार र एकताको भावना जगाउँछन्।”

नगर उप–प्रमुख जोगराम चौधरीले रामलीलालाई बेलौरी नगरको सांस्कृतिक पहिचानको अभिन्न हिस्सा भन्दै भने, “हामी आधुनिक विकासका कुरा गर्दैछौं, तर हाम्रो संस्कृति, धर्म र परम्पराको संरक्षण पनि उत्तिकै महत्वपूर्ण छ । रामलीलाले नयाँ पुस्तामा संस्कार र धार्मिक चेतना जगाउने पुलको काम गर्छ ।”

उद्घाटनमा स्थानीय कलाकारहरूले भगवान् श्रीराम, माता सीता, लक्ष्मण, हनुमान र रावणलगायतका पात्रहरूको जीवन्त अभिनय प्रस्तुत गरेछन् । संवाद, भजन, संगीत र झाँकीको अद्भुत संयोजनले मञ्चलाई आकर्षक बनाएको थियो । उपस्थित दर्शकहरू भावविभोर हुँदै जय श्रीरामका नारासहित मन्त्रमुग्ध बनेका थिए ।

रामलीला समितिका अध्यक्ष दिनेश कुँवरले यस वर्षको मञ्चनलाई अझ व्यवस्थित, प्रभावशाली र नेपाली भाषामा सन्देशमूलक बनाइएकाे बताए । उनले भने, “बेलौरीका कलाकारहरूको आत्मीय समर्पण र स्थानीय समुदायको समर्थनले यो रामलीला केवल मनोरञ्जन मात्र नभई सांस्कृतिक र आध्यात्मिक पुनर्जागरणको प्रतीक बनेको छ।”

रामलीला मञ्चनका निर्देशक डा. भूपेन्द्र सिंह विष्टले यस वर्षको प्रस्तुती कलात्मक, सांगीतिक र प्राविधिक रूपमा नयाँपनले भरिएको बताए । उनका अनुसार, “हामीले परम्परागत कथा र आधुनिक प्रस्तुति शैलीबीच सन्तुलन कायम गर्दै प्रत्येक दृश्यलाई दर्शकका लागि जीवन्त बनाउने प्रयास गरेका छौं । यसले हरेक दर्शकलाई रामको आदर्श जीवन र सत्यको सन्देश अनुभव गराउनेछ ।”

रामलीला कथाका व्याख्यानकर्ता प्रेम सिंह बोहराले प्रत्येक प्रसङ्गको आध्यात्मिक र जीवनपरक अर्थ व्याख्या गर्दै भने, “रामायण केवल कथा होइन, यो मानव जीवनको मार्गदर्शन हो । भगवान् रामको चरित्रले सत्य, धर्म र करुणाको मार्ग देखाउँछ । आजको युगमा रामलीलाको यही सन्देश सबैको हृदयमा जगेर्ना हुनुपर्छ ।”

कार्यक्रममा नगरका जनप्रतिनिधि, समाजसेवी, शिक्षक, पत्रकार, धार्मिक अगुवा, युवाहरू र सयौं श्रद्धालु भक्तजनको सहभागिता रहेको थियो । मञ्चन स्थल भक्तिभाव, उल्लास र आध्यात्मिक उमंगले ओतप्रोत बनिरहेको छ।

अध्यक्ष दिनेश कुँवरका शब्दमा, “यो केवल मञ्चन होइन, हाम्राे आस्था, सांस्कृतिक पहिचान र सामुदायिक एकताको जीवित प्रतीक हो । रामलीलाले बेलौरीलाई धार्मिक र सांस्कृतिक केन्द्रको रूपमा थप उजागर गरिदिएको छ ।” 

हेरक साँझ ६:३० बजे देखि सुरुहुने रामलीलामा सम्पूर्ण श्रद्धालु भक्तजनहरुमा उपस्थितका लागि आमन्त्रण गरिएकाे आयाेजकले जनाएको छ।,