बेलौरी काठमाडौं समाजद्वारा अपाङ्गहरूका लागि निःशुल्क कृत्रिम खुट्टा

बेलौरी, कञ्चनपुर -

अपाङ्गता भएका व्यक्तिहरूका लागि बेलौरी काठमाडौं समाजले निःशुल्क कृत्रिम खुट्टा वितरण कार्यक्रम सञ्चालन गर्न लागेको छ।

समाजले यो सामाजिक उत्तरदायित्वमुखी अभियानलाई मारवाडी सेवा समिति नेपाल र श्री पशुपति गौशाला धर्मशालासंगको संयुक्त सहकार्यमा अघि बढाएको हाे । 

कार्यक्रममार्फत खुट्टा गुमाएका र हिँडडुल गर्न कठिनाइ भोगिरहेका व्यक्तिहरूलाई निःशुल्क कृत्रिम खुट्टा उपलब्ध गराइनेछ।

बेलौरी काठमाडौं समाजका अध्यक्ष ज्ञानेन्द्र जोशीका अनुसार,यो अभियान समाजको दीर्घकालीन मानवसेवा प्रतिबद्धताको निरन्तरता हो। 

रेडियो सुदूर सञ्चार संगकाे कुराकानीमा अध्यक्ष जोशीले भने- “अपाङ्गता भएका दाजुभाइबहिनीहरूलाई पुनः आत्मनिर्भर बनाउन सघाउने हाम्रो उद्देश्य हो। यो सेवा पूर्ण रूपमा निःशुल्क हुनेछ।” 

कार्यक्रम अन्तर्गत बेलौरी नगरपालिकाभित्र स्थायी बसोबास गर्ने र कृत्रिम खुट्टाको आवश्यकता भएका व्यक्तिहरूलाई समाजले सेवा लिन आग्रह गरेको छ। 

इच्छुक व्यक्तिहरूले आफ्नो नाम, ठेगाना र फाेन नम्बर दर्ता गरी कार्यक्रममा सहभागी हुन पनि अपिल गरेको छ।

यस अभियानले अपाङ्गता भएका व्यक्तिहरूको दैनिकीमा सकारात्मक रूपान्तरण ल्याउने अपेक्षा गरिएको छ।

बेलौरी नगरका लागि सम्पर्क व्यक्ति:

1. दिपेन्द्र विष्ट – ९८५८७५२२०२

2. महेश राज जोशी – ९८५८७५२१२०

3. लक्ष्मण दियाल – ९८६८७५२४५२

समाजले यसअघि पनि राहत वितरण, रक्तदान, शैक्षिक सहयोग र स्वास्थ्य शिविर जस्ता सामाजिक उत्तरदायित्वका गतिविधिहरू सञ्चालन गर्दै आएको छ।

जोशीका अनुसार, “हामी केवल काठमाडौंमा बस्ने बेलौरियाहरूको संस्था होइनौं, हामी बेलौरी समाज रुपान्तरण मानवीय सेवा मूल्य मान्यताहरूको प्रतिनिधि पनि हौँ।, बेलौरीका नागरिकलाई आवश्यक परेमा जहाँ भए पनि सहयोग गर्ने हाम्रो प्रतिबद्धता र प्रयास निरन्तर जारी छ।”

स्थानीयस्तरमा यो अभियानले अपाङ्गता भएका नागरिकहरूमा आत्मविश्वास, सशक्तिकरण र सामाजिक सम्मानको भावना बढाउने अपेक्षा गरिएको छ ।