‘उज्यालो नेपाल पार्टी’ ले निर्वाचन आयोगमा अद्यावधिक विवरण बुझायो

ऊर्जामन्त्री कुलमान घिसिङको समर्थनमा ‘उज्यालो नेपाल पार्टी’ पुनर्गठन गर्दै निर्वाचन आयोगमा पुनः कागजात पेस गरिएको छ । काभ्रेका ज्ञानबहादुर तामाङले गएको साउन २७ मै दिएको निवेदनमा पार्टी पुनर्गठनको कागजात बुझाइएको हो ।

अन्तरिम सरकारमा तीनवटा मन्त्रालय सम्हालिरहेका घिसिङ पार्टीमा प्रत्यक्ष जोडिनुभएको छैन । तर, विभिन्न पक्षसँग छलफल गरी उहाँले पूर्व ऊर्जासचिव अनुपकुमार उपाध्यायको संयोजकत्वमा उज्यालो नेपाल पार्टी दर्ता प्रक्रिया अगाडि बढाउनुभएको हो ।

५१ सदस्यीय केन्द्रीय समिति रहेको पार्टीको चुनाव चिह्न बलेको चिम रहेको छ । ज्ञानबहादुर तामाङ केन्द्रीय सदस्य हुनुहुन्छ । त्यस्तै अधिवक्ता रमन कर्णको संयोजकत्वमा जेनजी युवाहरूले जनादेश पार्टी नेपाल गठन गरेका छन् । युवाहरूले हातमा माइक बोकेको चुनाव चिह्न राखेर दल गठन गरी दर्ताका लागि हिजो निर्वाचन आयोगमा निवेदन दिएका हुन् ।

निर्वाचन आयोगका अनुसार हिजोसम्ममा ३० वटा दल दर्ताको चरणमा छन् । यसमध्ये २१ नयाँ हुन् भने नौ पुराना हुन् । आयोगमा दर्ता भएका दलको संख्या एक सय २६ पुगेको छ ।