कृष्णपुरमा कोरियन सहयोगमा आधुनिक प्राविधिक शिक्षालय निर्माण हुँदै

कञ्चनपुर -

कञ्चनपुरको कृष्णपुर नगरपालिका–७ मा कोरियन सरकारको सहयोगमा आधुनिक प्राविधिक शिक्षालय निर्माणका लागि प्रक्रिया अघि बढेको छ। कोरिया अन्तर्राष्ट्रिय सहयोग नियोग (कोइका) को करिब १ अर्ब ४० करोड रुपैयाँ बराबरको सहयोगमा शिक्षालय निर्माण हुने नगरपालिकाले जनाएको छ।

सोमबार कोइकाका देशीय निर्देशक मुहेओन कङ, डेपुटी निर्देशक चोङ हि चोइ, सिटीइभिटिका कार्यकारी निर्देशक महेश भट्टराईलगायतको टोलीले निर्माण स्थलको अन्तिम अवलोकन गरेको हो।

नगरप्रमुख हेमराज ओझाका अनुसार प्राविधिक शिक्षालय निर्माणका लागि आवश्यक पर्ने विद्युत्, पानी, बाटोघाटो तथा अवरोधरहित कार्यान्वयनका लागि एमओयूमा हस्ताक्षर भइसकेको छ। कोरियन सरकारको संसदबाट समेत रकम स्वीकृत भइसकेकाले परियोजना अघि बढ्ने पक्का भएको उनले बताए।

ओझाले शिक्षालयमा शिक्षक तथा विद्यार्थीका लागि आवाससहितका पूर्वाधार रहने र इलेक्ट्रो–मेकानिकल, इलेक्ट्रिकल, अटोमोबाइल, पर्यटन–अतिथि सत्कार लगायत विषय सञ्चालन हुने जानकारी दिए। साथै, छोटो तथा दीर्घकालीन तालिम कार्यक्रमसमेत थप्दै लैजाने योजना छ। नगरपालिकाले मागअनुसार ३० हजार वर्गमिटर जग्गा उपलब्ध गराइसकेकाे र आवश्यक परे थप जग्गा उपलब्ध गराउन सकिने पनि ओझाले बताए।

अवलोकनपछि बोल्दै कोइकाका देशीय निर्देशक कङले कोइका प्रायः काठमाडाैं वरपर केन्द्रित रहेर परियोजना सञ्चालन गर्दै आएकोमा सुदूरपश्चिममा पहिलोपटक नयाँ परियोजना अघि बढाउन पाउँदा खुशी लागेको बताए। यस परियोजनाले स्थानीय युवामा गुणस्तरीय प्राविधिक शिक्षा पहुँच बढाइ रोजगारमूलक कौशल विकासमा मद्दत गर्ने विश्वास उनले व्यक्त गरे।

शिक्षालय निर्माण भएपछि ६ महिनादेखि ३ वर्षसम्मका विभिन्न प्राविधिक तालिम तथा शैक्षिक कार्यक्रम सञ्चालन हुनेछन्। आवश्यक प्रयोगशाला तथा उपकरण खरिदमा समेत कोइकाले सहयोग गर्ने जनाएको छ।