जथाभावी एन्टिबायोटिक सेवनले घाँटीको संक्रमण जटिल बन्दै

सामान्य घाँटी दुखाइमा जथाभावी पेनकिलर र एन्टिबायोटिक सेवन गर्ने प्रवृत्ति बढेपछि घाँटीको संक्रमण जटिल अवस्थामा मात्र बिरामीहरू अस्पताल आउन थालेका छन्। कोशी अस्पताल विराटनगरमा उपचारका लागि आएका जनपथ टोलकी विनिता गौतमले सुरुमा सामान्य घाँटी दुख्दा औषधि पसलबाट पेनकिलर किनेर खाएको तर समस्या नहटेपछि अस्पताल पुग्दा घाँटीमा संक्रमण भएर पीप जमिसकेको पाएको बताइन्। त्यस्तैगरी, सोही अस्पतालमा भेटिएका २१ वर्षीय युमेस गिरीले पनि मेडिकल पसलेको सल्लाहमा दुखाइ कम गर्ने औषधि खाए पनि इन्फेक्सन भइसकेको अवस्थामा मात्र अस्पताल आएको जानकारी दिए।

कोशी अस्पतालका नाक, कान, घाँटी रोग विशेषज्ञ डा. रौनक दाहालले सामान्यतया घाँटी दुख्नेबित्तिकै औषधि पसलमा गएर जथाभावी पेनकिलर र एन्टिबायोटिकको प्रयोग गर्ने प्रवृत्ति बढेकाले संक्रमणको अवस्थामा मात्र बिरामी अस्पताल आउने गरेको बताउँछन्। उनले के कारणले घाँटी दुखेको हो, कुन अवस्थामा संक्रमण छ र कुन औषधि कति मात्रामा सेवन गर्नेजस्ता विषयमा ध्यान नदिइ जथाभावी औषधि सेवन गर्नाले बिरामीको स्वास्थ्य निकै बिग्रँदै गएको जनाएका छन्।

डा. दाहालका अनुसार, घाँटीको संक्रमण प्रायजसो चिसो, लामो समयसम्म फ्रिजमा राखिएका खानेकुरा, धूमपान, धुवाँधुलो र प्रदूषित वातावरणका कारण हुने गर्दछ। हावाको माध्यमबाट भाइरस वा ब्याक्टेरिया (जस्तै: 'स्ट्रेप्टोकोकस') प्रवेश भई संक्रमण गराउँदा निल्न गाह्रो हुने, अत्यधिक दुखाइ हुने, ज्वरो आउने र टन्सिलाइटिस हुनेजस्ता समस्या उत्पन्न हुन्छन्। ब्याक्टेरियाको कारणले भएको संक्रमणले घाँटीमा सेतो पीप पनि देखिने गर्दछ।

उनले चिकित्सकको परामर्शबिना आपूmखुसी पेनकिलर, एन्टिबायोटिक औषधिको सेवन गर्नाले मुटु, मिर्गौला, कलेजो लगायतका संवेदनशील अङ्गहरूलाई असर पुग्ने भएकाले यसो गर्नु उचित नहुने बताएका छन्। साथै, चिकित्सकले दिएको एन्टिबायोटिक औषधिसमेत नियमपूर्वक सेवन नगर्दा ब्याक्टेरिया तथा भाइरस पूर्णरूपमा नमरी फेरि सक्रिय भई संक्रमण गर्न सक्ने भएकाले पूरा मात्रा सेवन गर्नुपर्नेमा उनले जोड दिएका छन्।

चिकित्सकहरूले घाँटीको संक्रमणलाई हेलचेक्र्याइँ गरेको खण्डमा बारम्बार टन्सिलाइटिस भई पीप जम्ने, रगतको माध्यमबाट जीवाणु मुटुको भल्वमा पुगेर भल्व फेर्नुपर्ने अवस्थासमेत आउन सक्ने भएकाले यस्ता लक्षण देखापर्नासाथ तुरुन्त उपचार गराउन सुझाव दिएका छन्।