निर्वाचनका लागि ६ अर्ब ९ करोड स्वीकृत, खर्च प्रक्रिया अघि बढ्यो : अर्थमन्त्री खनाल

अर्थमन्त्री रामेश्वर खनालले आगामी फागुनमा हुने निर्वाचनका लागि आवश्यक खर्च चालु आर्थिक वर्षको बजेटबाटै व्यवस्थापन हुने स्पष्ट पारेका छन्। राजधानीमा आयोजित एक कार्यक्रममा उनले तयारी नपुगेका साना योजनाको बजेट रोक्का गरेर निर्वाचन खर्च जुटाइएको जानकारी दिए।

अर्थमन्त्री खनालका अनुसार चालु बजेटमा समेटिएका करिब ३ करोड रुपैयाँका ४ हजारजति तयारीविहीन योजनाको बजेट रोक्का गरिएको छ। जसबाट करिब १२० अर्ब रुपैयाँ बराबरको स्रोत व्यवस्थापन गरिएको हो।

उनले निर्वाचन आयोगका लागि ६ अर्ब ९ करोड रुपैयाँ स्वीकृत भइसकेको र खर्च हुने क्रममा रहेको बताए। साथै, म्यादी प्रहरीका लागि करिब १७ अर्ब रुपैयाँ खर्च हुने उल्लेख गर्दै निर्वाचनका लागि आवश्यक उपकरण, मोटर तथा सवारीसाधनमा समेत २५-२६ अर्ब रुपैयाँ खर्च लाग्ने जानकारी दिए।

अर्थमन्त्री खनालले बजेटको पुनःप्राथमिकरणमार्फत निर्वाचन खर्च सहज रूपमा व्यवस्थापन गरिएको दाबी गरे।